باژێرێ هه‌ولێرێ ل چەند رۆژێن بووری دا پێشوازى ل پێنجەمێن پێشانگهه‌ها ڕۆژهه‌لاتا ناوه‌ڕاست يا په‌روه‌رده‌، ته‌كنۆلۆژيا و قوتابيان (MEETS 2026) كر، ئه‌وا ل پێشانگهه‌ها نێڤده‌وڵه‌تى يا هه‌ولێرێ ل ڕێكه‌فتى 30ى ته‌موزێ هه‌تا 2ى ئابێ 2026 هاتيه‌ سازكرن. ئه‌ڤ ڕووداوا چار ڕۆژى بوو پلاتفۆڕمه‌كا هه‌رێمى يا گرنگ بۆ گه‌هاندنا قوتابيێن نوی، ڤه‌كۆله‌ران، و لايه‌نێن په‌يوه‌نديدار و ئه‌كاديمى.

شاندێ زانكۆيا دهۆك ب ئاماده‌بوونا سه‌رۆكێ زانكۆيا دهۆك د. داود سليمان اتروشى و ڕاگرێ كۆليژا ئه‌ندازيارى د. نشوان شوكت محمود پشكدارى تێدا كر. شاندى پێكهاتبوو ژ د. سولين جلادت محمد صالح و ڕێزدار دلشير إدريس مصطفى ژ كۆليژا ئه‌ندازيارى، و خانم لاڤا نشوان رمزي ژ كۆليژا پلانسازیا شار و هەرێمان، دگه‌ل ڕێزدار حسين إسماعيل تتمي ژ ڕێڤه‌به‌ريا ڕاگه‌هاندنێ. تێدا شاندێ زانكۆيێ شیانێن زانستى و ڤه‌كۆلينێ يێن زانكۆيا دهۆك دانه‌ نيشادان و به‌رسڤا پرسيارێن قوتابيان دان، زێده‌بارى ئاڤاكرنا پرێن هه‌ڤكاريكرنێ دگه‌ل زانكۆ و دامه‌زراوێن دى.

ناساندنا پرۆگرامێ بەکالورویوسا ئەندازیارییا بایومیدیکاڵ:

ئێك ژ ته‌وه‌رێن سه‌ره‌كى يێن نوێنه‌رێن كۆليژا ئه‌ندازيارى د پێشانگهه‌ها MEETS 2026 دا، پێناسكرنا قوتابيان بوو ب به‌رنامێ بكالۆريۆس د ئه‌ندازياريا بایومیدیکاڵ دا (B.Sc. in Biomedical Engineering)، كو به‌رنامه‌كێ نێڤده‌وڵه‌تيێ هه‌ڤپشکە‌ دگه‌ل زانكۆيا THM (University of Applied Sciences Mittelhessen) يا ئه‌لمانى.

ده‌رباره‌ى به‌ش و پرۆگرامی

به‌شێ ئه‌ندازياريا بيۆمێديكال ل زانكۆيا دهۆك زانستێن ئه‌ندازيارى دگه‌ل زانستێن بيۆلۆجى و پزيشكى تێكه‌ڵ دكه‌ت دا كو ئاستێ خزمەتگوزاريێن ته‌ندروستى و ته‌كنۆلۆژيا پزيشكى ل هه‌رێما كوردستانێ ببلندبه‌ت.

هه‌ڤپشكيا ئه‌كاديمى يا ئه‌لمانى: ئه‌ڤ به‌شه‌ ب هه‌ڤكارى دگه‌ل ڕێكخراوا (DAAD) يا ئه‌لمانى و زانكۆيا THM ل باژێرێ گيسن هاتيه‌ دامه‌زراندن، و هه‌ڤكاريێ دگرتە خو د بياڤێ ئاڵوگۆڕكرنا مامۆستايان، سازكرنا ووركشۆپان، و په‌يڕه‌وكرنا ئاستێن فێركرنێ يێن نێوده‌وڵه‌تى.

مفايێ پزيشكى و پرۆژه‌يى: قوتابى دهێنه‌ مه‌شقكرن ل سه‌ر تێگهه‌شتن و شۆڤه‌كرنا سيسته‌مێن فسيۆلۆجى، شيكاركرنا داتايێن پزيشكى يێن له‌شێ مرۆڤى، زێده‌بارى دروستكرن و گه‌شه‌پێدانا ئامێرێن پزيشكى.

ئارمانجێن سەرەکی: ئارمانجا سه‌ره‌كى يا به‌شێ، پێگه‌هاندنا ئه‌ندازيارێن شارەزانه‌ بۆ پێشخستنا ژێرخانا پزيشكى د كه‌رتێن گشتى و كه‌سۆكى دا ل هه‌رێما كوردستانێ، دا كو خودان سه‌ربه‌خۆيى بن د ده‌ستنيشانكرن و چاره‌سه‌ريێن پزيشكى دا.

پتر پێزانینا بخوینە لسەر پرۆگرامی د لینکێ خوارێ دا:

پشکا ئەندازیاریا بایومیدیکاڵ