دەربارەی پرۆگرامی

پشکا ئەندازیاریا کارەب و کۆمپیۆتەرێ (ELCE) دناڤ کولیژا ئەندازیاریێ دا ل تەباخا ٢٠٠٦ هاتیە دامەزراندن. ئێکەمین و سەرەکیترین پرۆگرامێ وێ یێ ئەکادیمی، بەکالۆریۆسێ زانستێ یە د ئەندازیاریا کارەب و کۆمپیۆتەرێ دا. پرۆگرامی پێشوازی ل ئێکەمین دەستەیا قوتابیان ل چریا ئێکێ یا ٢٠٠٦ کر.

پرۆگرام ب شێوەیەکێ بەردەوام دهێتە دیزاینکرن و پێداچوون لسەر دهێتە کرن دا کو پێدڤیێن نها و پاشەرۆژێ یێن هەرێما کوردستانێ و عیراقێ بۆ ئەندازیارێن کارەب و کۆمپیۆتەرێ یێن خودان شیان دابین بکەت. پرۆگرامێ خواندنێ دگەل پێدڤیێن ABET (دەستەیا پشتڕاستکرنێ بۆ ئەندازیاری و تەکنۆلۆژیایێ) دگونجیت و بنەمایەکێ هەڤسەنگ د هەردوو بیاڤێن ئەندازیاریا کارەب و کۆمپیۆتەرێ دا دابین دکەت. وانەیێن تاقیگەهێ ژی پتر شیانێن قوتابیان د دیزاینکرنێ، کارێ تیم، و شارەزاییێن تەکنیکی یێن کرداری دا بهێز دئێخن.

پرۆژێ دەرچوونێ پشکەکا سەرەکی یا دیزاینێ یە د پرۆگرامی دا، کو چارەسەرکرنا ئافرێنەرانە یا ئاریشەیان و کارێ تیم یێ کاریگەر پێش دئێخیت. ژلایەکێ دیڤە، راهێنان (internships) دەلیڤەیێن بـها ددەتە قوتابیان دا کو زانینا خۆ د رەوشێن راستی یێن کاری دا بکاربینن. هەروەسا راهێنان پەیوەندیێن دگەل کەرتێ پیشەسازی بهێز دئێخیت و هاریکاریا ستافێ ئەکادیمی دکەت کو دگەل پێدڤیێن جڤاکی د پەیوەندیێ دا بن، کو گەلەک ژ وان دشێن ب رێکا پرۆژەیێن دەرچوونێ یێن قوتابیان بهێنە چارەسەرکرن.

زێدەباری ڤێ چەندێ، پرۆگرام کومەکا وانەیێن هەلبژارتی بخۆڤە دگریت، کو رێکێ ددەتە قوتابیان کو خواندنا خۆ لدیڤ حەز و داخازیێن گوهۆڕی یێن بازاڕی بگونجینن.

ئارمانجێن پەروەردەیی یێن پرۆگرامی (POEs)

ئارمانجێن پەروەردەیی یێن پشکا ئەندازیاریا کارەب و کۆمپیۆتەرێ (ELCE) ئەوە کو دەرچوویێن وەسا ئامادە بکەت کو:

1. ژیانەکا کاری یا سەرکەفتی د ئەندازیاریا کارەب و کۆمپیۆتەرێ دا یان بیاڤێن پێڤەگرێدای نیشان بدەن ب رێکا مفا وەرگرتنێ ژ شارەزاییا تەکنیکی، شیانێن شلۆڤەکرنێ، و داهێنانێ دا کو ب شێوەیەکێ کاریگەر پشکداریێ د پیشەیێن خۆ دا بکەن.
2. شیانێن بهێز یێن سەرکردایەتی، گەهاندن و کارێ تیم نیشان بدەن، کو وان بشیان بکەت ب شێوەیەکێ کاریگەر دناڤ تیمێن فرە-پسپۆری دا کار بکەن.
3. ئاریشەیێن جیهانا راستی چارەسەر بکەن و ئاستێ ژیانێ باشتر بکەن د هەمان دەم دا کو پێگیریێ ب ستانداردێن ئەخلاقی بکەن و ل بەرچاڤ بگرن کارتێکرنێن بەرفرەهـ یێن جڤاکی، ژینگەهی، و جیهانی یێن بریارێن ئەندازیاریێ.
4. پشکداریێ د فێربوونا هەتاهەتایی دا بکەن ب رێکا خواندنا بالا، پێشئێخستنا پیشەیی، و باوەرنامەیان یان دەلیڤەیێن دی یێن فێربوونێ دا کو دگەل تەکنۆلۆژیایێن پێشکەفتی بگونجن، پالپشتیێ ل داهێنانێ بکەن، و پشکداریێ د گەشەپێدانا تەکنۆلۆژیایێن نوو دا بکەن.

ئەنجامێن فێربوونێ یێن پرۆگرامی

پشتی ب سەرکەفتیانە ب دوماهی ئینانا ڤی پرۆگرامی، پێدڤیە قوتابی خودانێن ڤان شیانان بن:

1. شیانا دەستنیشانکرن، دارشتن، و چارەسەرکرنا ئاریشەیێن ئەندازیاری یێن ئالۆز ب رێکا جێبەجێکرنا پرەنسیپێن ئەندازیاری، زانست، و بیرکاریێ.
2. شیانا جێبەجێکرنا دیزاینا ئەندازیاریێ بۆ بەرهەمئینانا چارەسەریێن کو پێدڤیێن دیارکری بجـهـ دئینن دگەل ل بەرچاڤگرتنا ساخلەمیا گشتی، سەلامەتی، و خۆشگوزەرانیێ، هەروەسا فاکتەرێن جیهانی، رەوشەنبیری، جڤاکی، ژینگەهی، و ئابووری.
3. شیانا گەهاندنێ ب شێوەیەکێ کاریگەر دگەل کومەکا ئامادەبوویان.
4. شیانا نیاسینا بەرپرسیاریێن ئەخلاقی و پیشەیی د رەوشێن ئەندازیاریێ دا و دانا بریارێن ژیرانە، کو پێدڤیە کارتێکرنا چارەسەریێن ئەندازیاریێ د رەهەندێن جیهانی، ئابووری، ژینگەهی، و جڤاکی دا ل بەرچاڤ بگرن.
5. شیانا کارکرنێ ب شێوەیەکێ کاریگەر د تیمەکێ دا کو ئەندامێن وێ ب هەڤرا سەرکردایەتیێ دکەن، ژینگەهەکا هەڤکاریێ دروست دکەن، ئارمانجان دادینن، ئەرکان پلان دکەن، و دگەهنە ئارمانجان.
6. شیانا گەشەپێدان و ئەنجامدانا تاقیکرنێن گونجای، شلۆڤەکرن و تەفسیرکرنا داتایان، و بکارئینانا حوکمێ ئەندازیاریێ بۆ دەرئێخستنا ئەنجامان.
7. شیانا ب دەستڤەئینان و جێبەجێکرنا زانینێن نوو لدیڤ پێدڤیێ، ب رێکا بکارئینانا ستراتیژیێن فێربوونێ یێن گونجای.